Размаўляем па-беларуску !
21 лютага ва ўсім свеце адзначаўся Дзень роднай мовы. У ДУА " Рычоўскі дзіцячы сад- сярэдняя школа" гэты дзень прайшоў вельмі яскрава, весела і запамінальна.
Яшчэ напярэдадні свята была арганізавана выстава часопісаў і кніг беларускіх аўтараў. Ужо перад першым урокам у вучняў прысутнічаў святочны настрой. У кожным кабінеце праходзілі апошнія прыгатаванні да свята, прысвечанага роднай мове, літаратуры, народным звычаям і традыцыям. Навокал гучалі беларускія народныя і эстрадныя песні (не толькі раніцай, але і на перапынках). Вучні падрыхтавалі выставу сценгазет “Я люблю сваё роднае слова” . Прыцягвалі зацікаўленасць і ўвагу малюнкі, выкананыя вучнямі да мастацкіх твораў. Вучні 5-6 класаў прынялі ўдзел у інтэлектуальнай гульні “Беларуская скарбонка”, якую праводзіла Мажака В.В. Гульня прайшла пад дэвізам: “Хто шмат чытае, той розум мае”. Удзельнікі і гледачы атрымалі вялікую асалоду, разважаючы над прыказкамі, загадкамі і рэбусамі. Цяжка прыйшлося членам журы Рай Таццяне Міхайлаўне, Юшкевіч Сняжане і Бураку Дзмітрыю. У гарачым паядынку перамогу атрымала каманда "Папялушкі" 6 класа.
Вучні старэйшых класаў працавалі на розных прыпынках. Яны прапаноўвалі малодшым школьнікам перакладаць на беларускую мову тэксты, прадметы , якія былі намаляваныя на паперы, патрэбна было назваць на беларускай мове . Вельмі спадабалася вучням на прыпынку "Спяваем разам". Тут яны спявалі беларускія песні.
Але самая кульмінацыя свята роднай мовы адбылася ў канцы дня. Асаблівае ўражанне ўдзельнікі свята атрымалі ад беларускіх танцаў “Лявоніха”, “Ночка”, “Падыспань” у выкананні вучняў 8-10 класаў.
Нацыянальныя беларускія касцюмы, прадметы дэкору надалі святу яшчэ большую атмасферу радасці і весялосці.
Словы песні “Вёсачка мая” вымусілі задумацца аб тым, што трэба цаніць, прадаўжаць традыцыі свайго краю, народа, не цурацца роднай мовы, любіць сваю Радзіму. Свята застанецца ў памяці кожнага з нас назаўсёды. А як жа інакш!? Гэта ж усё сваё, роднае, матчына…
Вучаніца 9 класа Масла Аліна
